ಆಟಿ ಪೆಲಕಾಯಿ ನಂಜಿ ಜೋರುಗೆ ಗಾಳಿ ಬರ್ಸಗ್ ಇಲ್ ತೋರುಗೆ...ಆಟಿ ಪಂಡ ದಾದೆ ಒಂಜಾ ತ್ತ್ ವಿಷಯನ್ ತೆರಿಯೋನಗ

                                                                                                                                                      ಪವಿತ್ರ 

                                                                                                                                                  ಕಲ್ಲಬೆಟ್ಟು

ಆಟಿ ಪೆಲಕಾಯಿ ನಂಜಿ ಜೋರುಗೆ ಗಾಳಿ ಬರ್ಸಗ್ ಇಲ್ ತೋರುಗೆ ನಮ್ಮ್ ಹಿರಿಯಕುಲು ಪಂತಿನ ಗಾದೆದ ಪ್ರಕಾರ ತುಳುವೆರೆಗ್ ಬಡವುದ ತಿಂಗೋಲೆ ಈ ಆಟಿ. ಆಟಿ ತಿಂಗೊಲ್ಡ್ ತುಳುವೆರೆಗ್ ಬಾರಿ ಬಂಗದ ದಿನ ಗಾಳಿ ಬರ್ಸ ಗ್ ತರೆ ಪಿದಾಯಿ ಪಡೆರೆ ಆವಂದಿನ ಪೊರ್ತುಡು ಇಲ್ಲಡ್ ಕುಲ್ಲುದು ಕಿರೆಂಗ್, ಸಾಂತಾನಿ, ತಪ್ಪು ತಾಜಾಕ್ಲೆನ್ ತಿಂದ್ ಬದುಕೊಂದುದಿತ್ತೆರ್. ಆಯಿಟ್ಲಾ ಆಟಿ ಅಮಾಸೆದ ದಿನ ಕಷಾಯ ಪರ್ಪಿನ ಗತ್ತೆ ಬೇತೆ.... ಈ ಆಟಿ ಪಂಡ ದಾದೆ ಒಂಜಾ ತ್ತ್ ವಿಷಯನ್ ತೆರಿಯೋನಗ ಬಲೇ

ಆಟಿ ಅಮಾಸೆ ಸೋಣ ಬರ್ಪಿ ಸಂಕ್ರಾಂತಿ ಬೊಂತೆಲ್ ಡು ಮೂಜಿದ ಬಲಿ ದೇತೊಂದು ಪೊಲ ಓ ಬಲಿಯೇಂದ್ರ ಕೂ..... ತುಳುನಾಡ ಬಲಿಯೇಂದ್ರನು ಲೆತ್ಡ್ ಭೂಮಿದ ಒಡೆಯ ಆಯಿನ ಬಲಿಯೇಂದ್ರ ಗ್ ವರ್ಷಡ್ ಮೂಜಿ ಸರ್ತಿ ಋಣ ಸಂದಾಯ ಮಲ್ಪಿನ ತುಳುನಾಡ್ ದ ಮಲ್ಲ ಕಟ್ಟ್  ಪುರಾತನ ಕಾಲಡ್ ನಮ್ಮ್ ಹಿರಿಯೆರ್ ಮಲ್ತ್oದು ಬೈದಿನ ಪದ್ಧತಿನ್ ಇತ್ತೆಲಾ ಪಾಲಿಸಾವೊಂದುಲ್ಲಾ ಪೀರಾಕ್ಡ್

ಬಲಿಯೇಂದ್ರನ ಅಪ್ಪೆ ದಿತಿ ದೇವಿ ಭೂಮಿಗ್ ಬತ್ತ್ ದು ಈ ಆಟಿ ಅಮಾಸೆ ನಮಕ್ ತೆರಿಪಾಯೆರ್ ಪನ್ಪಿ ವಾಡಿಕೆ.

ಈ ಆಟಿ ಅಮಾಸೆದ ದುಂಬುನಾನಿ ಕಾಡ್ಗ್ ಪೂದು ಪಾಲೆದ ಮರನ್ ನಾಡುದು ಅವೆಕ್ ಬರೆದ ಬಳ್ಳಿನ್ ಕಟ್ಟಡ್ ಬರೊಡು ಮೋನದಾನಿ ಪುಲ್ಯಕಾಂಡೆ ಸೂರ್ಯ ತೋಜೋಡು ದುಂಬು ದಿವ್ಯ ಔಷದಿ ದಿಂಜಿನ ಪಾಲೆದ ಮರ ತ್ತ ಕೆತ್ತೆನ್ ಕಲ್ಲ್ಡೇ ಗುದ್ದುದು ಆ ಕೆತ್ತೆನ್ ಇಲ್ಲಗ್ ಕನವೊಡು ತುಳಸಿ ಕಟ್ಟೆ ಅತ್ತ್oಡಾ ದೇವರ್ ನ ಎದುರು ದೀದು ಮೀದ್ ಶುದ್ಧ ಆದ್ ದೇವೆರೆಗ್ ಅಡ್ಡ ಬುರುದು ಅಂಗಾಯಿದಾತ್ತ್ ಮಲ್ಲ 2 ಪಾಲೆದ ಕೆತ್ತೆನ್ ಪಾಡುದ್ ಒಂತೆ ಎಡ್ಡೆಮುಂಚಿ, ಓಮನ್ ಆಯಿತಾ ಒಟ್ಟಿಗೆ ಪಾಡುದ್ ಅರೆಪೋಡ್ ಬೊಕ್ಕ ಎಡ್ಡೆ ಕುಂಟುಡು ಪಂಟುದು ಕೆಂಪು ಬೊಲ್ಕಲ್ಲ್ನ್ ಕೆಂಪು ಕೆಂಡ ಆಪಿಲೆಕ ದಿಕ್ಕೇಲ್ಡ್ ಬೆಚ್ಚ ಮಲ್ತ್ ದು ಆ ಕಷಾಯಗ್ ಪಾಡೋಡು 

ಈ ಪಲೆದ ಮರಟ್ಟು ಔಷದಿ ಗುಣ ಉಂಡು  ಈ ಮರತ್ತ ಕೆಲುವು ಭಾಗಲೆನ್ ಆಯುರ್ವೇದಡ್ ಉಪಯೋಗಿಸವೆರ್.  ಈ ಕಷಾಯ ಪರ್ನೈದಾತ್ರ ದೇಹಡು ಉಷ್ಟ ಜಾಸ್ತಿ ಆಪುಂಡು ಆಯ್ಕೆ ಅವೆನ್ ತಂಪು ಮಲ್ಪರೆ ಮೆತ್ತೆದ ಗಂಜಿನ್ ಉನುಪೆರ್. ಈ ಕಷಾಯನ್ ಪರ್ನೈದಾತ್ರ ಮಲೇರಿಯಾ, ಅತಿಸಾರ ಚರ್ಮದ ಸಮಸ್ಯೆಲು ಕಮ್ಮಿ ಆಪುಂಡು ಅಂಚನೆ ಆಸ್ತಾಮ ಸಿಕ್ ನ್ ಗುಣ ಮಲ್ಪುನಂಚಿನ ಶಕ್ತಿ ಈ ಕಷಾಯಡ್ ಉಂಡು.

ಇಂಚನೇ ನಮ್ಮ ತುಳುನಾಡ್ದ ಸಂಸ್ಕೃತಿ  ದುಂಬುದ ಪೀಳಿಗೆಗ್ಲಾ ತೆರಿಪಾವುನ ನಮ್ಮ ಕರ್ತವ್ಯ

ನಮ್ಮ ತುಳುನಾಡ್ ನಮ್ಮ ಪೆರ್ಮೆ.